БИШКЕК, 13 –дек. — Sputnik. Бишкекте 2010-жылы кримтөбөл Максат Карасартовдун автоунаасын аткылоого тиешеси бар адамдар кармалганын ИИМдин маалымат кызматы кабарлады.
Билдирмеге караганда, окуя 2010-жылдын 12-апрелинде Ибрагимов жана Иваницин көчөлөрүнүн кесилишинде болгон.
Анда Mercedes Benz унаасындагы белгисиз адамдар Карасартов башкарып бараткан Mazda 626 автоунаасынын жанына келип, ага ок чыгарышкан. Алган жараатынан кримтөбөл окуя болгон жерде көз жумган.
Бул боюнча "Адам өлтүрүү" беренесинин негизинде иш козголуп, ИИМ бүгүн бул кылмышка тиешеси бар деген адамдар аныкталганын билдирди.
Министрлик кылмышка шектүүлөрдүн арасында 42 жаштагы Протез каймана аты менен таанылган Ш.А. бар экенин маалымдады.
"Чүй облусунун тургуну Көлбаевдин уюшкан кылмыштуу тобунун активдүү мүчөсү катары ИИМдин каттоосунда турган, бир нече жолу соттолгон. Ал мындан башка оор кылмыштарга, анын ичинде Чолпон-Ата шаарынын тургуну Кубанычбек Коноевдин өлүмүнө да шектелүүдө", — деп айтылат маалыматта.
Экинчиси да уюшкан кылмыштуу топтун активдүү мүчөсү катары ИИМдин каттоосунда турган Д.Ч. аттуу Чүйдө туулган жаран экени кошумчаланды. ИИМ ал буга чейин өлтүрүлгөнүн билдирди. Алдын ала маалыматтар боюнча, кеп Бишкектеги тергөө абагында өлтүрүлгөн Чыңгыз Жумагулов (Дөө Чыңгыз) тууралуу болууда. ИИМ бул иш боюнча тергөө уланып жатканын кошумчалады.