БИШКЕК, 11-дек. — Sputnik. Мэрия Бишкек шаарынын тургундарын аба ырайына байланыштуу коомдук транспортко өтүүгө чакырды.
Муниципалитет демилгени жол кырсыктарын алдын алуу максатында сунуштап жатат.
"Борбордогу коомдук транспорт шаардыктарды штаттык режимде таңкы саат 5:00дөн түнкү 23:30га чейин тейлейт. Саат 9:00дөн тарта 114 троллейбус, "Бишкек автотранспорт" ишканасынын 396 автобусу, "Жүргүнчүлөрдү ташуу" башкармалыгынын 276 автобусу, "Эко жүргүнчүлөрдү ташуу" ЖЧКсынын 110 жеке автобусу жана "Аламүдүн АвтоТранс" ишканасынын 5 автобусу жүрөт", — деп айтылат маалыматта.
Мындан тышкары, шаар боюнча 634 микроавтобус иштеп, зарыл болгон учурда линияга дагы кошумча автобус, троллейбустар чыгарыла турганы кошумчаланды. Мэрия аба ырайына карабай коомдук транспорттун иштөө графиги ошол бойдон кала берерин эскерткен.