БИШКЕК, 12-дек. — Sputnik. БАЭнин Газа боюнча резолюциясына БУУнун Коопсуздук кеңешинде вето коюп АКШ уюмдун өзөгүн түзгөн механизмге сокку урду. Бул тууралуу РФ ТИМинин расмий өкүлү Мария Захарова брифинг учурунда билдиргеннин РИА Новости кабарлады.
Эскерте кетсек, АКШ БУУнун Коопсуздук кеңешинде Бириккен Араб Эмирлигинин Газада атышууну токтотуу боюнча резолюциясынын долбооруна вето койгон. Буга ал документте ХАМАСтын сынга алынбаганын жана Израилдин өзүн коргоо укугу каралбаганын жүйө келтирген. Коопсуздук кеңешинин калган 13 мүчөсү резолюциянын кабыл алынышын колдоп, Улуу Британия калыс пикирин билдирген.
Мындан соң Ирандын Тышкы иштери министрлигинин расмий өкүлү Насер Канаани БУУнун Коопсуздук кеңеши тынчтык менен коопсуздукту сактоо боюнча негизги функциясын аткарууда жөндөмсүздүгүн жана майнапсыздыгын көрөткөнүн, АКШнын вето коюу укугу палестин маселесин туңгуюкка кептеп салганын белгилеген.
"Чыкылдап иштеп турган саатты бирөө келип балка менен талкалап салды дейли. Мында саат сапаты начар болгону үчүн иштебей калган жок да, саат кимдир бирөөнүн акылсыздыгынан улам жарактан чыкты. Азыр бул акылсыз киши АКШ болуп жатат. Резолюцияга вето коюшу — Американын жөн салды талашы эмес. Бул БУУнун өзөгүндөгү механизмге жасалган сокку", — деди Захарова суроого жооп берип жатып.
Тараптардын территориялык кызыкчылыгынан улам келип чыккан тирешүү 7-октябрда ХАМАСтын Израилге кол салуусунан кийин курчуп кеткен. Акыркы маалымат боюнча, кандуу кагылышууда 1,2 миң израилдик каза таап, 5 миң киши жарадар болсо, көз жумган палестиналыктардын саны 17 миңден ашты. 46 миңден ашуун адам ар кандай жаракат алганы айтылып келет.