БИШКЕК, 12-ноя. — Sputnik. Министрлер кабинетинин салык реформасын ишке ашырууга көмөк көрсөтүү максатында соода-базар комплекстеринин ээлери менен сүйлөшүүлөр жүргүзүлдү. Жыйынтыгында соода жайларынын ижара акысын төмөндөтүү макулдашылганын УКМК билдирди.
Маалыматка караганда, "Мадина" базарынын администрациясы ижара акыны 30 пайызга арзандатты. Токмок шаарындагы төмөнкү базарларда дагы 30 пайыздык жеңилдетүү болду:
"Токмок Булак" ЖЧКсына катталган Токмок шаарынын базары;
"Токмок Мүрөк" ЖЧКсы, республикалык маанидеги мал базары;
"Ак-Кеме Рахман" ЖЧКсына катталган кийим базары;
"Токмок" соода-базар комплекси;
Калаадагы кичи дүң базар.
Ушундай эле келишимдин алкагында "Кант" ЖЧКсына катталган базардын директору У.Мукеев калктын аялуу катмарынан чыккан ишкерлерге (соода менен алектенген пенсионерлерге) каржылык түйшүктү жеңилдетүү максатында соода жайларын бекер бермей болду.
Ижара акысы 30 пайызга төмөндөтүлгөн башка базарлардын тизмеси:
Кара-Балта шаарындагы "Береке" соода-базар комплекси;
Жайыл районундагы "Жайыл базары" соода-базар комплекси;
Москва районунун Беловодское айылындагы "Ярмарка" жана "Айдар" кичи базарлары;
Сокулук районунун Новопавловка айылындагы "Нурлан", "Жибек-Жолу", "Сары-Өзөн", "Айбек", "Заря" кичи базарлары, мал базары;
Панфилов районундагы "Артел О" жана "Ак-Жолтой" кичи базарлары.
Ал эми Жайыл районундагы (Кара-Балта шаары) унаа тетиктерди саткан базар ээси У.Ногойбаев ижара акыны 35 пайызга төмөндөттү. Ошол эле учурда Кемин районунун кичи базарларында (Кеминдеги "Ажка" кичи базары, Орловка айылындагы "Бар Бол" кичи базары) ижара акы 20 пайызга арзандады.
Буга чейин УКМК төрагасы Камчыбек Ташиев соодагерлердин ишин жеңилдетүү үчүн базарлардагы ижара акыны кеминде эки эсе азайтуу керектигин айткан.