БИШКЕК, 11-дек. — Sputnik. Бишкек шаарынын мэриясы коомдук транспортко түшүп, бирок жол кирени төлөбөй койгон жүргүнчүлөргө үч миң сомдук айып сала баштайт. Бул тууралуу вице-мэр Максат Сазыкулов билдирди.
Вице-мэр автобус, троллейбустарда көзөмөлдөөчү бригада иштей турганын айтты.
"Картаны аппаратка тийгизип төлөгөндөй түр көрсөтүп коюу схемасы эми иштебейт. Көзөмөлчүлөр жүргүнчүнүн картасын алып система аркылуу текшерет. Эгер төлөбөгөнү аныкталса айыпка жыгылат", — деди Сазыкулов.