БИШКЕК, 10-дек. — Sputnik. Саламаттык сактоо министри Алымкадыр Бейшеналиев Бишкек шаарындагы Балдар клиникалык тез жардам ооруканасына пландан тышкары барды. Бул тууралуу министрлик билдирди.
Бейшеналиев кезек күтүү боюнча даттануулардын көбөйүп жаткандыгын текшерген.
Министр балдарга медициналык жардам көрсөтүү кызматынын сапаты менен таанышып, ата-энелер менен баарлашып, бөлүмдөрдү кыдырганы белгиленди.
Оорукананын башкы дарыгери Акылбек Мамановдун айтымында, күнүнө 900дөй бейтап кайрылса, алардын 80 пайызы жолдомосуз келет. Ошондой эле Үй-бүлөлүк дарыгерлер борборлору иштебегендигине байланыштуу да кезек көбөйөрүн айтып, бирок бардык балага медициналык жардам жана консультация берилип жаткандыгын билдирген.
Мындан сырткары, министрдин тапшырмасы менен КРВИ жана сасык тумоо менен ооруган балдарды жайгаштыруу үчүн кошумча 30 орун даярдалганын айткан.