БИШКЕК, 9-дек. — Sputnik. АКШ Бириккен Араб Эмираттарынын Газа секторунда ок атышууну тез арада токтотууну жана бардык барымтадагыларды бошотууну талап кылган резолюция долбооруна БУУнун Коопсуздук кеңешинде вето койду. Бул тууралуу РИА Новости маалымдады.
БУУнун Коопсуздук кеңешинин 13 мүчөсү резолюцияны колдоду. АКШ ага каршы чыгып, Улуу Британия добуш берүүдөн баш тартты. БУУга мүчө 97 өлкө долбоордун авторлоштору болду.
Россиянын уюмдагы туруктуу өкүлүнүн биринчи орун басары Дмитрий Полянский Вашингтондун позициясын сынга алды.
"Бүгүн Жакынкы Чыгыштын тарыхындагы эң караңгы күндөрдүн бири болот десем аша чапкандык болбойт. АКШлык кесиптештерибиз Палестина-Израиль кагылышуу аймагында ок атышууну токтотуу чакырыгына дагы бир жолу көз алдыбызда уялбастан бөгөт койду. Муну менен алар Палестина менен Израилдин миңдеген, мүмкүн он миңдеген карапайым калкына, анын ичинде аялдар менен балдарга, ошондой эле аларга жардам берүүгө аракеттенген БУУнун кызматкерлерине өлүм өкүмүн чыгарды", — деп билдирди Полянский.
Резолюциянын долбоорунда Коопсуздук кеңеши "гуманитардык ок атышууну дароо токтотууну талап кылары" айтылган. Документте ошондой эле бардык барымтадагыларды дароо бошотуу жана гуманитардык жардам көрсөтүүгө мүмкүнчүлүк берүү талап кылынган.
Резолюциянын долбооруна ылайык, Коопсуздук кеңеши бардык тараптардан эл аралык укук боюнча, атап айтканда, жарандарды коргоо боюнча өз милдеттерин аткарууну талап кылат.
Мындан тышкары, документте "Газадагы катастрофалык гуманитардык кырдаалга жана палестиналык карапайым калктын азап чегип жатканына терең тынчсыздануу" айтылган.
Бул Израилдин Палестина анклавындагы аскердик пландарына бөгөт коюучу резолюцияга АКШнын вето койгон биринчи учуру эмес. Вашингтон Бразилиянын резолюция долбооруна 18-октябрда дагы бөгөт койгон. Ал документ Израилди Газа тилкесинен түштүккө көчүү буйругун алып салууга чакырган. АКШ андагы чечимин Израилдин өзүн-өзү коргоо укугу тууралуу айтылбаганы менен түшүндүргөн болчу.
Бириккен Араб Эмираттары резолюциянын долбоорун шаршемби күнү, БУУнун баш катчысы Антониу Гутерреш Коопсуздук кеңешинен Газада гуманитардык катастрофага жол бербөөнү талап кылгандан кийин таркаткан.
Мындан тышкары, Гутерреш БУУнун уставынын 99-беренесине ылайык, БУУнун Коопсуздук кеңешинин төрагасына кат жолдогон. Беренеде "Башкы катчы анын пикири боюнча эл аралык тынчтыкты жана коопсуздукту сактоого коркунуч келтире турган бардык маселени Коопсуздук кеңешинин кароосуна коюуга укуктуу" деп айтылат. Башкы катчынын расмий өкүлү Стефан Дюжаррик Гутерреш бул беренени биринчи жолу колдонгонун билдирген.