БИШКЕК, 8-дек. — Sputnik. Владимир Путиндин Жакынкы Чыгыш мамлекеттеринин лидерлери менен сүйлөшүүлөрү Американын аймактагы таасирин азайтууга жардам берет. Бул тууралуу Кытай саясат таануучусу Чжао Лун Kankan News порталындагы маегинде билдиргенин РИА Новости жазды.
"Россиянын БАЭ, Сауд Арабия жана Иран менен түз байланыштары Москванын кадыр-баркын жогорулатып, Жакынкы Чыгыштагы геосаясий чөйрөнүн абройлуу жана активдүү катышуучусу катары позициясын гана чыңдап тим болбостон, аймакта Американын таасирин азайтууга жана стратегиялык багытты өзгөртүүгө мүмкүндүк берет", — деген эксперт.
Ал РФ президентинин Жакынкы Чыгышка болгон сапарынын саясий маанисине көңүл бурган. Эксперттин ою боюнча, Владимир Путиндин Вашингтон менен жакын мамилени карманган Сауд Арабия жана БАЭге болгон ийгиликтүү сапарлары Батыштын Россияга каршы санкциялары чектелүү экенин айгинелейт.
Чжао Путиндин сапарынын экономикалык таасирине да токтолгон. Саясат таануучунун айтымында, бааны жогорулатуу үчүн мунай өндүрүүнү кыскартуу маселеси боюнча Москва менен Эр-Рияддын көз караштарынын дал келиши Россияга "кирешелерди жана экономикалык туруктуулукту жогорулатууга" мүмкүнчүлүк берет.
"Американын Украинага болгон жардамы солгундап баратканда Россия дипломатиялык жаатта жетишкендиктерге жетүүдө", — деп жазылат порталдын макаласында.
Эске салсак, шаршембиде россиялык лидер БАЭге барып президент Мохаммед бен Заед Аль-Нахайян менен сүйлөшүүлөрдү жүргүзгөн. Андан соң Сауд Арабияга сапар алып, өлкөнүн мураскор ханзаадасы Мухаммед Бен Сальман Аль Сауд менен Эр-Риядда жолуккан.