БИШКЕК, 6-дек. — Sputnik. Жылдык товар айлантуусу 15 миллион сомго жетпеген соодагерлерди салыктан бошотуу чечимин кабыл алдык. Бул тууралуу мамлекет башчы Садыр Жапаров "Кабар" агенттигине берген маегинде билдирди.
"Былтыр мен "жылдык товар жүгүртүүсү 8 миллион сомдон ашпаган соодагерлер үчүн эч бир салык болбосун, патент дагы албасын, жөн гана соода кыла беришсин" деп айткам. Кечээ жумушчу топ түзүп жөнөткөнүмдө товар жүгүртүүсү 8 миллиондон ашкан соодаргерлер көп экени билинди. Ошол үчүн бул сумманы 15 миллионго чейин көтөрүп берүү чечимин кабыл алдык. Максатыбыз — сооданы жаңы баштаган же кедейликтен чыга албай жаткан жөнөкөй соодагерлерди тез арада бутуна тургузуп, жок дегенде орто байлардын деңгээлине жеткирүү. Биздин милдет жана максат — адамдарды жакырчылыктан чыгаруу", — деген президент.
Ал ККМ аппараттары базарларга көмүскө экономиканы ачыкка чыгаруу максатында киргизилип жатканын кошумчалаган. Ошондой эле жакында өзүнүн болгон байлыгын ачыкка чыгара турганын белгилеп, базардагылар улам митинг кыла берсе, "Кумтөрдөгүдөй" тышкы башкаруу киргизиле турганын эскерткен.