БИШКЕК, 5-дек. — Sputnik. АКШнын Конгресстеги өкүлдөр палатасы 2024-жылдын биринчи жарымында президент Жозеф Байденге импичмент жарыялоо процедурасынын негизинде ага айып тагуу боюнча чечим кабыл алат. Бул тууралуу палатанын юридикалык комитетинин төрагасы Жим Жордандын айтымына таянып РИА Новости кабарлады.
Жордан Fox News телеканалына Байденге импичмент жарыялоо процедурасынын алкагында жүрүп жаткан Өкүлдөр палатасынын иликтөөсү тууралуу айткан.
"Акыркы бир нече күбө калды. Алар менен сүйлөшүүлөрдү эртерээк бүтүрөбүз деген үмүттөбүз", — деген ал.
Жордан Өкүлдөр палатасы декабрда бир-эки күбөдөн, январь айында дагы ошончо адамдан сурамжылоо жүргүзүүнү пландап жатканын белгилеген. Ал импичмент процедурасы конгрессмендер жаңы жылдык майрамдардан келгенден кийин негизги маселеге айланарын кошумчалаган.
"Байденге коюлган айыптар боюнча чечим 2024-жылдын ортосуна чейин чыгып калабы?" деген суроого Жордан "ооба, ага чейин кандайдыр бир чечим кабыл алынат деп ойлойм" деп жооп берген.
Буга чейин Өкүлдөр палатасынын спикери Майк Жонсон АКШ президенти Жозеф Байденге анын үй-бүлө мүчөлөрүнүн мыйзам бузганы боюнча болжолдуу маалыматты иликтөөгө Ак үй тоскоолдук кылып жатканы үчүн импичмент жарыялоо керектигин айткан. Ал юрисдикция боюнча бир нече комитет Байдендин укук бузууларынын далилдерин табуу үчүн өтө чоң жумуштарды жасап жатканын белгилеп, бирок Ак үй аларды бөгөттөп, "далил болчу миңдеген баракчаларды жашырып" жатканын кошумчалаган.
Ноябрдын аягында Washington Post басылмасы АКШ Конгрессинин Өкүлдөр палатасынын республикачылары жакынкы күндөрү Байденге импичмент жарыялоо процедурасынын алкагында иликтөө жүргүзүү маселесин добушка коёрун маалымдаган. Өкүлдөр палатасы Американын президентине каршы иликтөөсүн мурдагы спикер Кевин Маккартини кызматтан алынгандан кийин баштаган. Ал Банк көчүрмөлөрү Байдендин үй-бүлөсүнө жана алар менен байланышы бар адамдарга ар кандай жалган компаниялар аркылуу 20 миллион долларга жакын каражат төлөнгөнүн көрсөтүп турганын билдирген.
Өкүлдөр палатасында көпчүлүктү түзгөн республикачылар Байдендин уулу Хантердин бизнесине жана жалпы эле үй-бүлөсүнө карата иликтөө жүргүзүүдө. Демократтар башында турган өткөн чакырылыштагы палата ошол кездеги республикачы президент Дональд Трампка карата териштирүү жүргүзүп, кийин эки ирет импичмент процедурасын өткөрүшкөн.