Учурда Кыргызстан адал туризми боюнча 130 мамлекеттин ичинен 30-орунда турат. Бул тууралуу Алмаз Кайырбеков Sputnik Кыргызстан радиосунун эфиринде маек куруп жатып билдирди.
Анын айтымында, өлкө бул тармактан алдыңкы ондукка кирүүгө аракет кылышы керек.
"Азыркы кезде 130 мамлекеттин ичинен 30-орунда болуп жатканыбыз жакшы жетишкендик. Бирок биздин максат — алдыңкы ондукка кирүү. Ал үчүн туристтерге заманбап шарттарды түзүп берип, коркпой эле инвестиция кылыш керек. Эс алуучу жайларды сатып салбай кирешенин жарымы инвесторго, жарымы мамлекетке түшө турган кылуу шарт. Ал жерлерди сатып жибербей, оңдоп-түзөп, балдарыбызга калтырып беришибиз керек. Ал эми чет элдик ишкерлер болсо өзүнүн акчасын чыгарып, иштеткен жерин Кыргызстанга калтырып кеткидей кылуу зарыл. Туристтердин аркасынан инвестиция келет. Айрымдар жөн гана эс алууга келсе, айрым ишкерлер эс алганча өлкөдө бизнес кылууга кандай мүмкүнчүлүктөр бар экенин байкап көрөт. Адал туризм — диний принциптерге ылайык саякат", — деди Кайырбеков.
Ал Кыргызстанга келген туристтердин көбү өлкө аркылуу Өзбекстанга баргысы келерин кошумчалады.