БИШКЕК, 29-ноя. — Sputnik. Президент Садыр Жапаров 30-ноябрда Бириккен Араб Эмирлигине иш сапары менен бара турганын президенттик администрациянын тышкы саясат бөлүмүнүн башчысы Муратбек Азымбакиев билдирди.
Бул күндөрү Дубай шаарында БУУнун климаттын өзгөрүшү жөнүндө Алкактык конвенциясынын тараптарынын 28-конференциясынын жогорку деңгээлдеги сегменти өтөт.
Азымбакиевдин айтымында, 12-декабрга чейин созула турган кезектеги Климаттык конференцияга дүйнө жүзү боюнча лидерлер чогулуп, климаттын өзгөрүшүнө каршы Париж келишимин ишке ашыруунун жүрүшүн талкуулап, глобалдык жылуулукту чектөө боюнча мындан аркы кадамдарды аныкташат.
"1-декабрда Садыр Жапаров БУУнун климаттын өзгөрүшү жөнүндө Алкактык конвенциясынын тараптарынын 28-конференциясынын пленардык отурумунда сөз сүйлөйт. 2-декабрда БАЭ менен энергетика жана инвестиция жаатында бир катар биргелешкен документтерге кол коюу пландалууда. Андан соң БАЭнин Улуттук күнүн майрамдоого катышып, иш сапар ошону менен аяктайт", — деди Азымбакиев.