БИШКЕК, 29-ноя. — Sputnik. Россия жарандыгын жеңилдетилген шартта ала турган кесиптердин тизмеси жаңыланып, ал 15-декабрдан тарта күчүнө кирет. Өзгөрүүлөр тууралуу РУДНдин экономика факультетинин доценти Андрей Гиринский "Прайм" агенттигине айтып берген.
Анын маалыматы боюнча, Эмгек министрлиги тизмени кайсы кадр жетишпей жатканын карап кеңейткен. Мында педагогдор, медиктер, айыл чарба жана азык-түлүк өнөр жайынын кызматкерлери тууралуу кеп болууда. Жаңы тизмеге геологиялык чалгындоо, курулуш жана кайра иштетүү тармагы, ошондой эле IТ-кесиптер кирген.
Муктаждык аз болгон кесиптер тизмеден алынды. Алардын катарында жогорку квалификацияны талап кылбаган жумушчулар бар.
"Чет элдиктердин РФ жарандыгын алуусуна жеңилдик берген кесиптердин тизмесинин өзгөрүшү экономикалык алкактан алып караганда миграциялык агымды оптималдаштыруу жана жөнгө салууга аракет болуп саналат", — деди Гиринский.