БИШКЕК, 29-ноя. — Sputnik. Мамлекеттик салык кызматынын өкүлдөрү митингге чыккан "Кара-Суу" базарынын соодагерлери менен жолугуп, ККМ аппаратын колдонуу боюнча түшүндүрмө беришти.
Алар "Дордой" жана "Кара-Суу" базарларында соода кылгандарга өзгөчө зонадагы салык режими киргизилгенин дагы бир жолу түшүндүрүп, эки базарда иштегендер ККМ, эсеп-фактурасын колдонуудан бошотулганын айтышты. Түшүндүрүү иштеринен кийин нааразычылык акциясы токтоп, митингге чыккандар тарап кетишкен.
Эске салсак, бүгүн, 29-ноябрда, Ош облусунун "Кара-Суу" базарынын соодагерлери ККМ колдонууга каршы экенин айтып, райондук администрациянын алдына митингге чыгышкан.
Буга чейин Экономика министрлиги "Дордой" жана "Кара-Суу" базарлары Кыргызстандагы стратегиялык маанидеги объектилерге кирерин айтып, өзгөчө зонадагы салыктык режим "Дордой" менен "Кара-Суу" базарларында гана иштээрин белгилеген. Мындай зонада соода кылгандар көзөмөл кылган кассалык машиналарды колдонуу милдетинен бошотулары, бирок жылдык соода жүгүртүүсү тууралуу декларация тапшырып, ошого жараша салык төлөй тургандыгы айтылган.