БИШКЕК, 29-ноя. — Sputnik. Бишкек — Нарын — Торугарт жолунун Балыкчы шаарындагы тилкесинде фейерверк жүктөп бараткан унаа кырсыктап, бир адам каза болду. Бул тууралуу Өзгөчө кырдаалдар министрлиги билдирди.
Маалыматка караганда, Howo үлгүсүндөгү жүк ташуучу унаанын айдоочусу рулду башкара албай жол кырсыгына кабылган. Анын кесепетинен ичиндеги фейерверктер жарылып, машина күйүп кеткен.
Окуя бүгүн, 28-ноябрда, кечки саат 21:40тар чамасында болгон. Балыкчы шаарынан эки өрт өчүрүүчү бригада тартылып, жалын саат 23:05те чектөөгө алынган.
Унаанын ичинде каза болгон адамдын өздүгү такталууда.