Үйлөнүү тойлору ашыкча ысырапкорчулук менен өткөрүлүп жатат. Муну жөнгө салуу боюнча пикиримди социалдык тармакка жазсам эл колдоп, мамлекеттик ишмерлерге чейин кызыгуусун билдиришти. Бул тууралуу Аскар Салымбеков Sputnik Кыргызстан радиосуна маек куруп жатып билдирди.
Анын айтымында, той өткөрүү эрежесин алгач кечикпей келүүдөн баштоо зарыл.
"Азыркы үйлөнүү тойлору адаттан тыш ысырапкорчулукка алып келүүдө. Кыз узатууга эле 500 киши чакырып жатышат. Нике кыюуну да ресторанда өткөрүп калдык. Түштөнүү, эшик-төр көрүү, канчалаган мал союлуп, себеттер жасалып, мунун баары ысырапкорчулук да. Жылкы, эсепсиз койлор союлуп жатат. Малдын деле убалына калмай болдук. Кийилбеген чүпүрөктөр кимге керек? Кызыгы, тойлордо ушундай майда-чүйдө эрежелердин көбүн аялдар киргизет экен да, азыр үйлөнүү үлпөттөрүнө кеткен чыгымды азайталы десек колдогондордун көпчүлүгү да аялдар болууда. Калк арасында катуу талкуу жараткан идеям куру сөз болуп калбаш үчүн досум, сүрөтчү Асан Турсункулов экөөбүз болжолдуу сценарийин жазып чыктык. Ага ылайык, биринчи кезекте той айтылган учурунда башталышы керек. Өзгөчө аткаминерлер кечигип келип, элдин баарын күттүрөт. Мына ушуну токтотуу зарыл. Анан той эки бөлүктөн турса. Башында кызды алып кирип, жар-жар айтылып, эки тараптын туугандары бир чыгып батасын берип, куттуктап кетет. Андан кийин кадырлуу коноктору да чогуу чыкса, үчүнчү болуп эки тараптын куда-сөөктөрү чыгып куттуктап, ошону менен тойдун биринчи бөлүгү жыйынтыкталса. Бул аралыкта тарсылдаган музыкасы жок, жагымдуу, жай чыккан күүлөрдүн коштоосунда өтсө, жалпы 2-2,5 саат убакытта жыйынтыкталып калса жетет. Анан сый тамак тартылат, каалагандар кете берет. Андан соң жаштар бөлүгү өтүп, ал деле ашыкча ызы-чуусу жок 2-2,5 саат болуп, жалпы тойго беш саат убакыт бөлүнсө жетет. Учурда мындай сценарий элге жагып жатат. Эми муну ишке ашыруу үчүн алдыдагы тойлорду ушундай форматта үлгү катары өткөргөндөр болушу шарт. Ошолордун арасында өзүм дагы жакындарыма тойду ушундай эрежеде өткөрүп, элге жайылтууну сунуштайм. Айта кетүүчү жагдай, биз үлпөт тойлорунун гана сценарийин жазып чыктык. Муну жолго салып алсак, башка тойлор да эрежеге түшүп калар деген изги тилегим бар. Биз эми ашыкча чыгым коротпой акыл-эс менен чечип, сарамжалдуу жашай турган доорго келип жеттик", — деди Салымбеков.
Ал тойлор коммуникациянын очогу болушу зарылдыгын, азыркы тойлордо алып баруучунун туткунундай болуп эле коноктор менен жакындан таанышып сүйлөшүү мүмкүнчүлүгү жоктугун кошумчалады.