Москвадагы Щукин атындагы театралдык институтка кыргызстандык студенттерди каттоо мөөнөтү 30-ноябрда жыйынтыкталат. Окуу жайга өтүүнү каалагандар "Россотрудничество" уюмунун расмий сайтынан каттоодон өтүүсү зарыл. Бул тууралуу Уланбек Өмүралиев Sputnik Кыргызстан радиосуна маек куруп жатып билдирди.
Анын айтымында, окуу жайга актерлук кесип боюнча 18-22 жаштагы улан-кыздар, режиссерлукка 30 жашка чейинкилер тапшыра алат.
"Аталган институт 22 таланттуу, жаш кыргызстандыкты төрт, беш жыл бою бюджеттик негизде окутуп берүүнү пландап жатат. Мындай мүмкүнчүлүк "Россотрудничество" менен биздин Маданият министрлигинин аракети аркылуу ишке ашууда. Окууну каалагандарга жатакана берилет, 20 миң сомго чукул стипендия алышат, бюджеттик негизде окушат. Бул долбоор аркылуу окууга өтүү үчүн "Россотрудничествонун" расмий сайтынан каттоодон 30-ноябрга чейин өтүп, талап кылынган документтерди тиркеп коюусу зарыл. Андан соң сынак жүрөт, ага Россиядан педагогдордун келиши күтүлүүдө", — деди Өмүралиев.
Ал мындай мүмкүнчүлүк жыл сайын эле боло бербестигин айтып, таланттуу жаштарды мүмкүнчүлүктөн пайдаланып калууга чакырды.