БИШКЕК, 28-ноя. — Sputnik. Евробиримдик дипломатиясынын башчысы Жозеп Боррель Палестин-Израиль жаңжалы боюнча кырдаалга баа берип жатып, эртең өлүп калышы мүмкүн болгондорго гуманитардык жардам жөнөтүүнүн зарылдыгы жок экенин айтты. Ал биримдиктин форуму өткөн соң Барселонада маалымат жыйын өткөргөнүн РИА Новости жазды.
"Кыйналган жай тургундарга колдоо көрсөтүшүбүз керек. Бул үчүн гуманитардык жардамдын көлөмүн көбөйтүү зарыл. Бирок эртең өлтүрүп кетиши мүмкүн болгондорго тамак-аш берүүнүн эмне кажети бар", — деген Боррель.
Дипломаттын айтымында, адам өлүмүнө жеткирбөө үчүн бомбалоону токтотуу керек. Ал гуманитардык жардам зарыл экенин, бирок жетишсиз болуп жатканын белгиледи. Боррель согуштук аракеттерди токтотуу боюнча узак мөөнөттүү макулдашуу түзүү азыр артыкчылыктуу багыт деп эсептейт. Мындан тышкары, саясатчы ХАМАС Газа секторунда аскердик үстөмдүгүнөн баш тартышы керек деген пикирде.
Палестина мамлекетин түзүүгө ыктаган Боррель жаңжалды токтотуудагы үч маанилүү аспектини атады. Мында кеп Израилдин Газаны "реколонизациялоосуна" жол бербөө, Батыш жээкке мыйзамсыз отурукташуудан баш тартуу жана Палестина автономиясына анклавга кайтуусуна уруксат берүү туралуу болууда.
Газадагы элдешүү
Жума күнү Газа секторунда Катардын ортомчулугу менен жүзөгө ашкан Израиль жана ХАМАСтын ортосундагы кыска мөөнөттүү элдешүү тууралуу макулдашуу күчүнө кирди. Ага ылайык, элдешүү 10 күндөн ашпайт.
Алгачкы үч күндө ХАМАС 50 күндөн бери туткундалып турган 40 израилдик менен 18 чет элдик жаранды бошотту. Израль 117 палестиналык туткунду кое берди. Азыр тараптар калган туткундарды бошотуу боюнча сүйлөшүүлөрдү жүргүзүп жатышат.
ХАМАСтын барымтасында 200дөн ашуун адам болушу мүмкүн экени айтылууда.
Кечээ ХАМАС элдешүүнүн мөөнөтү дагы эки күнгө узарганын билдирди.
Израиль макулдашуу аяктагандан кийин армия ХАМАСты жок кылуу операциясын уланта турганын эскертип келет.