БИШКЕК, 25-ноя. — Sputnik. Кыргызстандык ырчы Азат Раимбердиев Россиянын "Ну-ка, все вместе!" музыкалык долбоорунда экинчи орунду ээледи. Бул тууралуу “Россия” телеканалынын маалымат кызматы билдиргенин РИА Новости жазды.
Биринчи орунду душанбелик Фаррух Хасанов, үчүнчүнү москвалык Софико Кардава жеңип алды.
“Ар бир этапта эмоциянын деңгээли жогорулап жатып, финалда туу чокусуна жетти. Эмоция жагынан процесс сонун болду! Жашоонун даамын таттым. Долбоор өзүмө болгон ишеним менен жакшы тажрыйба берди”, — деген Раимбердиев.
Долбоордо 64 ырчы 100 калыстын сынынан өттү. Калыстар тобунун жетекчиси Сергей Лазарев жана көрсөтүүнүн алып баруучусу Николай Басков ырчы-конкурсанттарга, калыстарга жана көрүүчүлөргө колдоо көрсөткөндүгү үчүн ыраазычылык билдиришкен.
Бул долбоордун бешинчи сезону. Анын баш байгеси — 5 миллион рубль.