БИШКЕК, 24-ноя. — Sputnik. Милиция ири өлчөмдөгү алдамчылыкка шектелген аялды кармады, анын жарандарга келтирген зыяны болжол менен 500 000 долларды түзөт. Бул маалыматты ИИМ таратты.
Ленин райондук милициясына алдамчылыктын 40тан ашык фактысы, Октябрь райондук милициясына алдамчылыктын 10дон ашык фактысы боюнча арыз катталган. ИИМден Бишкек шаарынын башка ички иштер башкармалыктарында арыздар бар экенин, бул боюнча шектүү катары 38 жаштагы К.М. аттуу аялдын өтүп жатканын билдирди.
"К.М. элдин ишенимине оңой кирип, кыймылсыз мүлк сатып алууда кызматтарды сунуштап, потенциалдуу кардарларды өзүнө тартып турган. Мында ал жеке үйлөрдү куруу үчүн берилүүгө тийиш эмес болгон жер тилкелерин башка адамдарга сатууга жетишкен. Бишкек шаарынын Ленин райондук ички иштер башкармалыгында алдамчылык жолу менен 60 000 доллар акчаны ээлеп алуу фактысы боюнча кылмыш иши иликтенүүдө", — деп билдирди ИИМдин маалымат кызматынан.
Шектүүнүн берген убадасын аткарбай из жашырганын айтышты.
"Батир сатып алууга жардам берем деп убада берген, бирок акча алгандан кийин изин жашырган. Кардар өзү жасап ала турчу шарттагы курулуп жаткан үйлөрдөн батирлерди убада кылган. Ошол эле учурда кардарларды башка бирөөнүн батирине алып келип көрсөткөн. Ошондой эле ал айрым жарандардан жүз миң долларынан ашык акчасын ээлеп алгандыгы тууралуу маалымат келип жатат", — деп айтылат ИИМдин билдирүүсүндө.
Милициядан жабырлануучуларга келтирилген жалпы зыян 500 000 доллардан ашарын жана бул азырынча алдын ала маалыматтар экенин айтышты.
Шектүү кечээ, 23-ноябрда, кармалган. Учурда ал Бишкек шаарынын ИИББинин убактылуу кармоочу жайына киргизилген. Азыр тергөө иштери жүрүп жатканын айтышты.