БИШКЕК, 23-ноя. — Sputnik. Кумтөрдү сырттан башкарып кеткен Теңиз Бөлтүрүк 880 миллион сом зыян келтиргени аныкталып, анын 862 миллиону ордуна коюлган. Бул тууралуу башкы прокурордун орун басары Үмүткан Коңкубаева парламентте билдирди.
Депутат Улугбек Ормонов ал мамлекеттен миллиарддап уурдап, бирок 800 миң сом айып менен эле кутулдубу деп соцтармакта түшүнбөй жатканын айткан.
"Туура эмес маалымат тарап жатат. Теңиз Бөлтүрүк болгону жасаган кылмышы үчүн жазасын алды. Ал айыпталган берене боюнча эң жогорку айып пул 800 миң сом болчу", — деп жооп берди Коңкубаева.
Эске салсак, Теңиз Бөлтүрүк 2022-жылы сентябрда кармалган. Быйыл 30-апрелде үй камагына чыгарылган. Ал эми 21-ноябрда толук түрдө эркиндикке чыккан.
Бөлтүрүктү президент Садыр Жапаров 2021-жылы Кумтөрдү мамлекетке алуу учурунда компанияны башкарууга чакырган. Кийинки жылы Эсеп палатасы ишканадан финансылык алешемдиктерди таап чыгып, Бөлтүрүк менен компаниянын каржы директору Рыспек Токтогулов кызматтан четтетилген. Башкы прокуратура коррупциялык схемадан улам мамлекетке 1 миллиард сомдон ашуун зыян келтирилгенин аныктаган болчу. Жалпы тогуз киши суралган.