Өспүрүм кезде балдар чоң киши болгонун далилдегиси келерин Айнек Муратбекова Sputnik Кыргызстан радиосунун эфиринде маек куруп жатып билдирди.
Анын айтымында, мындай учурда бала үчүн ата-эненин жана коомдун түшүнгөнү маанилүү.
"Балдар үчүн эмнеге өспүрүм курак кыйын? Өткөөл куракта эмоцияларды түшүнүү жеңил болбойт. Аны балдар өздөрү да түшүнө албай кыйналат. Мындан улам ата-эненин же улуулардын колдоосу жана көзөмөлү чоң роль ойнойт. Өспүрүм кезде балдар өз алдынча чечим кабыл ала аларын, чоң киши болуп калганын тастыктагысы келет. Бирок ата-энелер баласын бала катары көргөндүктөн ар кандай келишпестиктер, түшүнбөстүктөр жаралат. Бала бул куракта тамеки тартып баштаса, же чачын боеп, кыркып салса, мындай жүрүм-турумдун аркасында сөзсүз бир маселе жаткан болот. Өткөөл куракта туура чечим кабыл алып, анализ жүргүзүүнү көбүнчө эмоция жеңип кетет. Баланы мындай учурда ата-эне да, коом да түшүнбөй жатса, анда бала акыркы чекит ушул жер экен деп ойлоп калышы мүмкүн", — деди психолог.
Ал өспүрүм куракта бала көбүрөөк көңүл бурууну талап кыларын кошумчалады.