4-декабрда "Манас" эпосунун күнүнө карата Кыргыз улуттук "Манас" театрынын жаңы курулган имаратын ачуу пландалып жатат. Учурда бардык даярдыктар жүрүп, курулуштун акыркы иштери калганын Чыңгызхан Кожош Sputnik Кыргызстан радиосунун эфиринде маек куруп жатып билдирди.
Анын айтымында, имарат эки кабаттан туруп, 300 орундуу залды камтыган, административдик жана чыгармачыл жамаат үчүн иш бөлмөлөрү болот.
"Учурда Кыргыз улуттук "Манас" театрынын өзүнүн имараты курулуп жатат. 4-декабрда "Манас" эпосунун күнүнө карата ачылышы болот деп турабыз. Имарат эки кабаттан туруп, 300 орундуу залды камтыйт, административдик жана чыгармачыл жамаат үчүн иш бөлмөлөрү болот. Театрда Назаркул Сейдракманов, Табылды Актанов, Амантай Кутманалиев өңдүү залкарларыбыз, улуу көчтү улаган төкмө акын, дастанчы, манасчы, аспапчы жаш таланттардын көп болгону кубандырат. Кыргыз маданиятын жайылтып, айтуучулук өнөрдү жаштарга жеткирүүдө бул өнөркананын мааниси зор. Мамлекет маданиятка көңүл буруп, колдоо көрсөтүп турса, коомдун багыты да туура нукка бурулабы дейм", — деди Кожош.
Ошондой эле адис төкмө акындар арасында кыз-келиндердин саны көбөйүп, республикалык, эл аралык айтыштарда чоң атаандаштык көрсөтө баштаганын кошумчалады.