Кийинки муундун өкүлдөрү "бурадар" сөзүнүн маанисин билбей, колдонбой жатышкандай. Бул тууралуу Нурбек Талантбеков Sputnik Кыргызстан радиосунун "Көөнө сөз" рубрикасында билдирди.
Анын айтымында, "Манас" эпосунда бул сөз байма-бай кездешет.
"Соңку убакта "бурадар" деген сөз адабий китептерде эле кездешип, сейрек колдонулууда. Кийинки муун анын толук маанисин биле бербегендей түр калтырат. “Манаста” дагы көп кездешкен бул сөз теңтуш, жолдош, курдаш, курбу, дос деген мааниде колдонулат. Маселен:
"Бурадарым келсеңчи,
Буудан оозун бек буруп,
Караан болуп берсеңчи.
Жан дүйнөмө өзгөчө,
Бараан болуп берсеңчи.
Алышам деген душманга,
Араан болуп берсеңчи" деген саптардан жакын досунан колдоо, таяныч, жөлөк күтүп жатканын аңдасак болот", — деди Талантбеков.
Ошондой эле ал бабалардан жеткен баалуулуктарды кийинки муунга жеткирүү ар бир кыргыздын парзы экенин кошумчалады.