БИШКЕК, 19-ноя. — Sputnik. Ден соолукту чыңдоо жана массалык коммуникация республикалык борбору антибиотиктин кооптуу жактары тууралуу маалымат берди.
ДССУ тарабынан 18-24-ноябрь күндөрү микробго каршы препараттарды туура колдонуу боюнча дүйнөлүк жумалык жарыяланган. Анын максаты — антибиотиктерди ичүүдө инфекциялардын жаралуу жана жайылышына жол бербөө эрежелерин үйрөтүү.
Тарыхта алгачкы антибиотик 1928-жылы 28-сентябрда Александр Флеминг тарабынан ойлоп табылган. Андан бери бул дарылар миллиондогон өмүрлөрдү сактап калды, бирок медиктер аны туура колдонуу талап кылынарын эскертет. Мисалы, вирустук ооруларга дароо антибиотик колдонгондо, кийин жөнөкөй инфекцияларды да дарылоо кыйынчылык жаратат.
Андыктан төмөнкүдөй эрежелерди сактоо сунушталды:
дарыгер жазып бермейин антибиотик ичпеңиз;
вирустук инфекцияларды дарылоо үчүн антибиотик колдонбоңуз;
“ооруп калбайын” деп алдын ала сактаныш үчүн антибиотик ичпеңиз;
абалыңыз бир аз жакшырып калса эле антибиотикти токтотуп койбоңуз, медик жазып берген дарылануу процессин аягына чыгарыңыз;
ак халатчандар айткан доза боюнча эч өзгөртпөй колдонуңуз;
дарыланып бүткөндөн кийин антибиотиктер ашып калса “көп акчага сатып алдым эле, ыргыткым келбейт” деп калганын да ичип салсаңыз кесепети оор болушу мүмкүн;
сизге жазып берген антибиотикти башкаларга бербеңиз.
Эгер дарыгер антибиотик колдонбосо, ал сизге кайдыгер болгонунан эмес, анын кереги жоктугунан кабар берет.
Адистер адамдын өмүрү жана бүтүндөй адамзаттын ден соолугу антибиотикти туура пайдаланууга байланыштуу экенин эскертти.