БИШКЕК, 18-ноя. — Sputnik. Россиянын тышкы иштер министри Сергей Лавров Казакстан, Кыргызстан, Тажикстан, Түркмөнстан жана Өзбекстандын Москвадагы элчилери менен жолукту.
РФ ТИМинин маалымат кызматы билдиргендей, ар бир регион менен ар тараптуу кызматташтык, КМШ, ЕАЭБ, ЖККУ, ШКУ сыяктуу эл аралык уюмдарда өз ара иштешүү маселелери талкууланган.
“Тараптар соода-экономикалык мамилелердин туруктуулугун, товар жүгүртүүнүн өсүшүн, илим-билим жана маданий-гуманитардык тыгыз байланыштарга канааттануусун билдиришти. Стратегиялык өнөктөштүгүбүздүн көп пландуу комплексинин туруктуу өнүгүшүн, анын ичинде коопсуздук жана регионалдык туруктуулукту өз ара камсыздоо белгиленди”, — деп айтылат маалыматта.
Ошону менен катар Борбор Азия+Россия форматында кызматташуу жана биринчи саммиттин жыйынтыгын ишке ашыруу маселелери өзүнчө каралган. Ал эми суу колдонуу жаатында илимий-практикалык кооперацияларды өнүктүрүүгө, Аралдын жака-белиндеги экологиялык көйгөйлөрдү чечүүгө өзгөчө көңүл бурушкан.