Инвестициялар жөнүндө мыйзамдын жаңы редакциясы иштелип чыкты. Анда инвесторлорго ыңгайлуу шарттарды түзүү чаралары каралып, экономиканын өсүшүнө өбөлгө болгон механизмдер камтыларын Нурадил Баясов Sputnik Кыргызстан радиосунун эфиринде маек куруп жатып билдирди.
Анын айтымында, долбоор каражат салчу тараптардын укуктук мамилелерин жөнгө салууга, мамлекеттин инвестициялык саясатынын принциптерин белгилөөгө багытталган.
"Экономикадагы өзгөрүүлөрдү эске алып инвесторлорго бардык ыңгайлуу шарттарды түзүү максатында бир катар иштер пландаштырылды. Президенттин "Инвесторлорду коргоо жана колдоо", "Инвесторлорго жагымдуу шарттарды түзүү" боюнча жарлыктарынын негизинде жаңы кадамдар иштелип чыкты. Алсак, учурда Инвестициялар жөнүндө мыйзамдын жаңы редакциясы даярдалды. Долбоор каражат сала тургандардын укуктук мамилелерин жөнгө салууга, мамлекеттин инвестициялык саясатынын принциптерин белгилөөгө багытталган. Мындан тышкары, экономиканын өсүшүнө өбөлгө болгон механизмдер камтылат. 2026-жылга чейинки өлкөнү өнүктүрүүнүн улуттук программасынын негизинде өсүштөргө жетүү үчүн бардык аракеттер көрүлүп жатат", — деди Баясов.
Ошондой эле адис бизнес коомчулуктардын арасында инвесторлордун даттанууларын кароо тартибин кеңири жайылтуу боюнча пландар талкууланганын кошумчалады.