БИШКЕК, 17-ноя. — Sputnik. Чыңгыз Айтматов Кыргызстан менен Россиянын ортосундагы достук мамилени жогору баалачу. Бул тууралуу Россиянын Федералдык жыйынынын төрайымы Валентина Матвиенко жазуучунун 95 жылдыгына арналган эл аралык конференцияда билдирди.
Төрайымдын айтымында, Айтматовдун эки элдин достугун бекемдөөгө кошкон салымы зор.
"Жазуучу жаратылышынан жаратман болгон. Ал кыргыз жана орус тилдеринде эркин сүйлөгөн үй-бүлөдө чоңойгонун баарыбыз билебиз. Ал "кыргыздарга бул эки тил бир куштун эки канатындай" деп абдан туура айткан. Айтматов мамлекеттик тил саясатчылардын эрки менен эмес, турмуштук зарылчылык менен аныкталарын белгилеген. Жазуучу Россия менен байланышты сактоо Кыргызстандын кызыкчылыктарына жооп берерине ишенген", — деген Матвиенко.
Ал Россия менен Кыргызстандын азыркы саясаты улуу жазуучунун идеяларына толугу менен дал келерин белгилеген.
"Эки өлкөнүн башчылары саясий, экономикалык жана гуманитардык байланыштарды бекем кармоодо. Бул Евразия мейкиндигинде туруктуулукту сактоодо зор мааниге ээ", — деген ал.