БИШКЕК, 17-ноя. —Sputnik. Соода-өнөр жай палатасынын Баткен жана Ош облустук бөлүмдөрүнүн жетекчилеринин мыйзамсыз ишине бөгөт коюлганын УКМКнын маалымат кызматы билдирди.
Ага ылайык, көмүрдү экспорттоо менен алектенген субъектилер акчалай сыйлык үчүн жасалма документтердин (эсеп-фактуралар, тапшырык кагаздары жана келишимдер) негизинде бөлүм башчылардан товарлардын келип чыгышы тууралуу сертификаттарды алышкан.
"Сертификатта 1 килограммы 10-12 сом турган кымбат БК маркасындагы көмүр 1 килограммы 1-1,5 сомду түзгөн көмүрдүн БСШ сорту деп жазылып, экспорттолуп турган. Башкача айтканда, документте кымбат көмүр арзан көмүр катары сыртка сатылып турган", — деп жазылат маалыматта.
Мындан тышкары, эки бөлүм башчы көрсөткөн "кызматтардын" негизинде салык органдарына касса аркылуу түшкөн каражаттардын отчетунда кирешелер системалуу түрдө кем бааланып келген. УКМК мунун кесепетинен ири өлчөмдөгү салык төлөмдөрү өлкөнүн бюджетине түшпөй калганын айтты.
"Бул сертификаттарды берүү боюнча кызматтар негизинен П.К. аттуу бөлүм башчынын үй-бүлө мүчөлөрүнө таандык компаниялар тарабынан көрсөтүлгөн. Мында П.К. уюштуруучу же директор болгон. Буга байланыштуу 12-ноябрда анын үйүндө, ошондой эле ага караштуу фирмалар жайгашкан үч даректе тинтүү жүргүзүлүп, жыйынтыгында бул ишке тиешелүү документтер, 28 миң доллар, 1 миллион 997 миң сом жана 99 миң рубль, печаттар, кыймылсыз мүлк документтери табылган", — деп айтылат кабарда.
Учурда мамлекетке келтирилген зыянды аныктоо боюнча тиешелүү тергөө иш-чаралары жүрүп жатканы кошумчалады.