БИШКЕК, 16-ноя. — Sputnik. Министрлер кабинетинин төрагасынын орун басары Эдил Байсалов Санкт-Петербург шаарынын губернатору Александр Беглов менен жолугушту. Бул тууралуу өкмөттөн кабарлады.
© Фото / пресс-служба кабинета министров КР
Сүйлөшүүлөр Смольный сарайында жүргөн. Анда соода-экономикалык, маданий-гуманитардык кызматташтыктын жана билим берүү тармагындагы өз ара кызматташуунун актуалдуу маселелери талкууланды.
Байсалов 21-сентябрда Бишкекте өткөн соода-экономикалык, илимий-техникалык жана маданий кызматташуу боюнча өкмөттөр аралык Кыргызстан-Санкт-Петербург биргелешкен комиссиясынын кезектеги 12-жыйынынын ишинин маанилүүлүгүн белгиледи.
Ал ошондой эле быйыл Санкт-Петербург шаарында Кыргызстандын Башкы консулдугу ачылганын эске салып, анын иши эки тараптуу кызматташтыктын бардык багытын, негизинен соода-экономикалык жана маданий-гуманитардык тармактарда бекемдей турганын айтты.
Ал эми Александр Беглов Кыргызстандын экономикасынын олуттуу өсүшүнө байланыштуу өз ара мамилелер чыңдалып жатканын белгилеп, биргелешкен долбоорлорду жана демилгелерди ишке ашырууга даяр экендигин билдирди.