Эгемендүүлүк жылдарында балдар музыкасы көңүл чордонунан сыртта калды. Мындай пикирин Камчыбек Букалаев Sputnik Кыргызстан радиосуна маек куруп жатып билдирди.
Анын айтымында, аталган тармакта системалуу иштер жүрбөй жатат.
"Советтер Союзу учурунда Москвада телевидениенин алдында "Балдар чоң хору" бар эле. Алар кичинекейлерге арналган музыкалар менен алектенчү. Мындай мүмкүнчүлүктөр азыр да бар, бирок ишти уюштуруп жасаган мекеме жок. Биз, обончулар, композиторлор, музыканы жазып эле жатабыз, токтоп калган жок. Алар ашып кетсе музыкалык мектептердин окуучулары тарабынан аткарылып, ошону менен бүтөт. Келечекти патриоттуулукка, жаратылышты сүйүүгө, ынтымакка тарбиялайбыз десек, балдар музыкасын колго алуу керек. Жазылып жаткан музыкалар бала бакча, музыкалык окуу жайларга таратылып, методикалык китептер чыгарылып, радио, телевидениелерге жаздырылса, министрлик тарабынан тапшырмалар берилип, багыттар белгиленип, ошого жараша чыгармалар жазылып иш колго алынса болмок", — деди Букалаев.
Композитор кичинекейлердин өздөрү мындай аракеттерди кубануу менен кабыл аларын кошумчалады.