Конституция Кыргызстанда ратификация болгон көптөгөн эл аралык келишимдердин негизинде аныкталган. Бул тууралуу Таттыбүбү Эргешбаева Sputnik Кыргызстан радиосунун "Онлайн адвокат" рубрикасында билдирди.
Анын айтымында, Кыргызстандын Баш мыйзамы 1993-жылдын 5-майында кабыл алынып, андан бери 11 жолу өзгөрүп, акыркысы 2021-жылдын 5-майында кабыл алынып иштеп жатат.
"Конституция — мамлекеттин негизги мыйзамы, эң жогорку юридикалык күчкө ээ болгон ченемдик-укуктук акт. Ал мамлекеттин саясий, укуктук, экономикалык жана башка системаларынын негиздерин аныктайт. Анын биринчи беренесине ылайык, Кыргызстан эгемендүү, суверендүү, демократиялык, унитардуу, укуктуу, светтик жана социалдык мамлекет деп саналат. Анын эгемендүүлүгү мамлекеттин бардык аймагына бирдей тиешелүү. Конституциялык түзүлүштүн, саясий системанын аныкталышы ар бир жаранга түздөн-түз тиешеси бар. Мисалы, ишкер, мамлекеттик кызматкер, мигрант ж.б. бардыгы үчүн Кыргызстандын мыйзамдары, анын башында турган Конституция концептуалдуу болгон мыйзамдык концепциясын түзүп берген. Андан сырткары, Баш мыйзам Кыргызстанда ратификация болгон көптөгөн эл аралык келишимдердин негизинде аныкталган. Жалпысынан Конституция өлкөнүн кызыкчылыгы, анын жарандарынын жашоого, дем алууга, пикирин эркин билдирүүгө, билим берүүгө жана башка боюнча жалпы багыттарды берет. Ошого таянып кодекстер, мыйзамдар, укуктук актылар кабыл алынат", — деди Эргешбаева.
Юрист калган мыйзам, кодекстер Конституцияга ылайыкталып чыгарыларын кошумчалады.