БИШКЕК, 8-ноя. — Sputnik. Президент Садыр Жапаров бүгүн, 8-ноябрда, Ташкент шаарына болгон иш сапарынын алкагында Өзбекстандын президенти Шавкат Мирзиёев менен жолугушту. Бул тууралуу өлкө башчынын маалымат кызматы кабарлады.
Өлкө лидерлери кыргыз-өзбек эки тараптуу кызматташтыгынын актуалдуу маселелерин талкуулашты.
"Тараптар эки өлкөнүн ортосунда биргелешкен ири инвестициялык, транспорттук жана энергетикалык долбоорлор ырааттуу ишке ашырылып, маданий-гуманитардык алмашуу активдешип жатканын, ошондой эле эки тараптуу товар жүгүртүүнү көбөйтүү боюнча жемиштүү иштер уланып, мында өсүштүн оң динамикасы байкалганын канааттануу менен белгилешти", — деп айтылат маалыматта.
Жолугушуунун аягында Садыр Жапаров менен Шавкат Мирзиёев эки өлкө элинин жыргалчылыгы үчүн өнөктөштүктүн бардык тармактарында достукту жана ынак коңшулукту мындан ары дагы өнүктүрүүнү макулдашты.