Акыркы жылдары Кыргызстанда миопия, глаукома ооруларынан жабыркаган адамдардын саны кескин өстү. Бул тууралуу Гүлзат Оморова Sputnik Кыргызстан радиосунун эфиринде маек куруп жатып билдирди.
Анын айтымында, Дүйнөлүк саламаттыкты сактоо уюмунун статистикасы боюнча, дүйнөдө 2 миллиарддан ашык адам миопиядан жабыркайт.
"Дүйнөлүк саламаттыкты сактоо уюмунун статистикасы боюнча дүйнөдө 2 миллиарддан ашык адам миопия менен ооруйт. Бул дүйнө калкынын 30 пайызга жакынын түзөт. Ал эми тобокелчилик факторун эске алсак, 5 миллиарддын тегерегиндеги адам көз ооруларына кабылышы мүмкүн. Тилекке каршы, акыркы жылдары Кыргызстанда миопия, глаукома ооруларынан жабыркаган адамдардын саны кескин өстү. Учурда ымыркайларда да көздүн илдеттери катталууда. Алдын алуу кампанияларына көңүл буруп, көздү сактоону үйрөнүү керек. Муну менен бирге жарандардын медициналык сабаттуулугун жогорулатууга да басым жасалышы зарыл", — деди Оморова.
Ошондой эле ал офтальмолог болууну каалагандар көбөйүп жатканын, мамлекет артыкчылыкты кадр даярдоого бериши керектигин кошумчалады.