БИШКЕК, 8-ноя. — Sputnik. Кыргызстанда быйыл Россиядан алынып келинген жайыт өсүмдүктөрүнүн үрөндөрү 300 гектар жерге себилди. Бул туурасында Айыл чарба министрлигинин маалымат кызматы билдирди.
Маалыматка ылайык, кийинки 2024-жылы ал үрөндөрдүн түшүмүн жыйнап алып, андан ары да жайыттарды оңдоого пайдаланылат.
Бийлик малдын туягы көбөйгөнүнө байланыштуу миллион 800 миң гектар жайыт деградацияга учураганын билдирген. Аны калыбына келтирүү максатында 26 миллион 811 миң сомго Россиядан көп жылдык чөптүн алты түрүнүн 99,5 тонна көлөмдөгү үрөнү сатып алынган. Мунун ичинен беш тоннасы өлкөдөгү үрөнчүлүктү өнүктүрүүгө жумшалат.