Көк бөрүдө эми улакчылар менен аттар камсыздандырылат. Камсыздандыруу компаниялары менен келишим түзүп, дүйнөлүк спорттун тажрыйбасын колдонуп, жаңы талаптарды кошобуз. Бул тууралуу Рамис Жунусалиев Sputnik Кыргызстан радиосунун эфиринде маек куруп жатып билдирди.
Анын айтымында, улакчылар буга чейин ар кимиси колунан келген жаракаттан коргоочу каражаттарды колдонуп келишти.
"Көк бөрү заманбап талаптарга жооп берген эрежелерди киргизиши керек. Алсак, көк бөрүдө улакчылар жана аттар камсыздандырылышы абзел. Анткени балдардын коопсуздугу, алардын ден соолугу эң маанилүү. Камсыздандыруу компаниялары менен келишим түзүп, дүйнөлүк спорттун тажрыйбасын колдонуп, жаңы талаптарды кошобуз. Мындан тышкары, жигиттердин оюнда жаракат албашы үчүн атайын форма даярдалышы керек. Бүгүнкү күндө "кудай сактасын" деп эле ойноп жатабыз. Тебетей кийгенибиз менен ал оюнчуну канчалык деңгээлде коргой алары белгисиз. Эми коопсуз шлем, кийим боюнча иш алып барабыз", — деди Жунусалиев.
Ошондой эле адис Көк бөрү федерациясы маркетинг бөлүмүн ачып, киреше табуу жолдору каралып, улакчылар, көрүүчүлөр үчүн бардык шарттар түзүлөрүн кошумчалады.