БИШКЕК, 6-ноя. — Sputnik. БУУнун Газа секторунда палестиналык качкындар менен иштеп жаткан агенттигинин көз жумган кызматкерлеринин саны 88ге жетти, уюм буга чейин бир да жаңжалда мындай чоң жоготууга дуушар болгон эмес. БУУнун гуманитардык ведомстволорунун жетекчилери жасаган бирлешкен билдирүү тууралуу РИА Новости жазды.
"7-октябрда көз жумгандардын арасында БУУнун Качкындар менен иштөө агенттигинин 88 кызматкери бар. Бул бир кагылышууда катталган эң чоң жоготуу", — деп белгиленген документте.
Билдирүүгө кол койгон БУУ Баш катчысынын гуманитардык маселелер боюнча орун басары Мартин Гриффитс, Дүйнөлүк саламаттык сактоо уюмунун башчысы Тедрос Аданом Гебрейесус, ЮНИСЕФтин аткаруучу директору Кэтрин Рассел жана башка жооптуу адамдар Газада ок атууну токтотуп, туткундагыларды бошотууну талап кылышты.
Жакынкы Чыгыштагы жаңжал
Израиль менен Палестинанын кырды бычак мамилеси 2023-жылдын 7-октябрында Израиль Газа сектору тараптан ракеталык чабуулга туш болгондон тарта курчуп кетти. Сокку ургандан кийин ХАМАС жоокерлери еврей мамлекетинин түштүк аймактарына кирип барып, кыймылдын аскердик канаты "Аль-Акса топон суусу" операциясын жарыялаган. Жооп иретинде ЦАХАЛ ХАМАСка каршы "Темир кылыч" операциясын баштаган. Израиль чабуул жасалгандан бир нече күн өткөн соң Газа менен чектешкен калктуу конуштарды кайра өз көзөмөлүнө алып, сектордун аймагындагы объектилерге сокку ура баштаган. Мындан тышкары, аймакты толугу менен блокадалап, суу, азык-түлүк, электр кубаты, дары-дармек, отун ташуу токтотулган.
Газа тилкесиндеги каза тапкандардын саны 9 миң кишиге жетип, 32 миңден көбүрөөк адам жаракат алганы айтылды. Ал эми жергиликтүү бийликтин маалыматында Израилден 1,4 миң киши көз жумганы, ар кыл эсептер боюнча 150 израилдиктин ХАМАСта кармалып турганы айтылууда.
Тараптардын аймактык кызыкчылыгы менен байланышкан палестин-израиль жаңжалы ондогон жылдардан бери аймактагы кагылышуунун себепкери болуп келет. СССРдин кийлигишүүсү менен 1947-жылы БУУ Израиль жана Палестина мамлекеттерин түзүү чечимин кабыл алган. Бирок натыйжада Израиль гана түзүлгөн. Тель-Авив эки өлкө принцибине макул болгону менен палестиналык аймактарды бошотпой келет.