БИШКЕК, 4-ноя. — Sputnik. Кыргызстанда алгачкы бажы кампасы (бонддук кампа) "Нарын" эркин экономикалык аймагында курулууда. Бул тууралуу Инвестициялар боюнча улуттук агенттик билдирди.
Бажы кампасы — импорттук товарлар бажы алымдары менен салыктары алынбастан бажы көзөмөлү алдында сакталган жер.
Агенттик бул кампа Нарын облусуна инвестиция тартуу жана аймакты өнүктүрүү үчүн жасалган биринчи кадам экенин белгиледи.
Инвестициялар боюнча улуттук агенттиктин директорунун орун басары Нурадил Баясов GuangDong Logistics Profession Association ассоциациясынын президенти Ма Жэньхун жана Guangzhou Flyt Logistic Limited ишканасынын директору Чжу Цзэвэн менен жолугушуп, "Нарын" эркин эконоикалык аймагында бажы кампаларын куруу боюнча сүйлөшкөн. Анын алкагында учурда кытайлык инвесторлор "Нарын" ЭЭАнын субъектиси болгон "Кара-Булак" ЖЧКсы менен биргеликте Ат-Башы районунда бажы кампасын куруп жатат.
Ошондой эле келечекте электрондук коммерция үчүн онлайн-аянтча түзүү жана "Нарын" ЭЭАнын аймагында автоунаа базарын куруу, Кыргызстандын айыл чарба продукциясын Кытайга экспорттоо долбоорун түзүү пландалганы айтылды.
Эркин экономикалык аймак — улуттук жана чет элдик ишканаларды коргоо максатында жеңилдетилген шарттары бар экономикалык зона.
Кыргызстанда Бишкек, Каракол, Маймак, Нарын, Лейлекте эркин экономикалык аймактар бар.