БИШКЕК, 2-ноя. — Sputnik. Бишкекте өлтүрүлгөн бир үй-бүлөнүн иши боюнча сотто Чынтемир Аширалиевдин жактоочусу бир нече жүйө келтирип, айыпкерди актоого аракет кылды.
Ал экспертизалар кылмышты Аширалиев жасаганын так далилдебегенин айтып, психиатриялык экспертиза өткөрүлбөгөнүн белгилеген.
"Канзаманова "аялыңа жакын мамилелерин айтып салам" деп Аширалиевге узак убакыт бою моралдык кысым, шантаж кылып келген. Аширалиевдин 3 баласы бар. Канзаманова андан уул төрөгөнүн айтып, жардам катары акча сурап жүргөн. Жакшы жашоосу бар туруп кылмышка барууга эмне себеп? Кыйноо болуп, ал уруп-сабалган. Бир дагы акыл-эстүү адам мындайга барбайт. Баткендеги жер тилкесин, Mercedes-Benz, Toyota Highlander унааларын камактан чыгарууну суранабыз", — деген Аширалиевдин жактоочусу.
Ал жабырлануучулар өтө көп компенсация сурап жатканын айтып, соттон адилеттүү өкүм чыгарууну суранган.
Сотто Аширалиев өзү да күнөөсүн мойнуна албай, күмөн жараткан абал көп болгонун белгилеген.
"Ушундай болуп калды, элден, туугандарынан кечирим сурайм. Канымды кармалгандан кийин 10 күндөн кийин алышкан. Бул күмөн жаратат. Жабыркаган тараптын тууганы ИИМде башчы экен, мени эмнеге сабашканын билбейм. Аудиобилдирүүдөгү үндөр биздики экени далилденген эмес. Картама банкомат аркылуу акча которгонуна да далил жок", — деген ал.
Эскерте кетсек, үрөй учурган каргаша үстүбүздөгү жылдын 16-февралында 5-кичи райондогу батирлердин биринде болгон. Анда 51 жаштагы аял (Алтынай Канзаманова) жана анын 17 жаштагы кызы менен 9 жаштагы уулу киши колдуу болгон. Бул кылмышка шектелип УКМКнын мурдагы кызматкери, 37 жаштагы Чынтемир Аширалиев кармалган.
Ал эми мамлекеттик айыптоочу Чынтемировду өмүр бою эркинен ажыратууну суранып жатат.