БИШКЕК, 1-ноя. — Sputnik. Саламаттык сактоо министрлиги өлкөдө кызамык боюнча кырдаал дагы эле курч экенин айтып, илдетке кабылгандар тууралуу жалпы маалымат берди.
Билдирмеге караганда, жыл башынан бери өлкөдө 3 289 адам кызамык оорусуна чалдыккан. Алардын басымдуу бөлүгү 4 жашка чейинки балдар жана эмдөөдөн өтпөгөн окуучулар.
"Жалпысынан кызамык боюнча кырдаал Кыргызстанда курч бойдон калууда. Бишкекте эки менчик бала бакчада жана бир менчик мектепте кызамык менен ооруган учур катталган. Каракол шаарында оору бир мектептен чыкса, Жалал-Абадда эки мектепте катталып, мындан улам билим берүү мекемелери убактылуу онлайн окууга өтүшкөн", — деп жазылат маалыматта.
Министрлик оору Бишкек, Ош шаарларында жана Чүй, Ош облустарында көп катталып жатканын билдирип, мындан улам кызамык, кызылча илдеттерине каршы 9 айдан 7 жашка чейинки балдар кошумча эмделип жатканын белгиледи. Ошондой эле ата-энелерди балдарын эмдетүүдөн баш тартпоого чакырды.
Кызамык — коркунучтуу инфекциялык жугуштуу оору. Атайын дарылоо ыкмасы жок, эмдөө менен алдын алууга болот.