БИШКЕК, 31-окт. — Sputnik. Айыл чарба министрлиги дыйкандарга шафран өсүмдүгүн өстүрүүнү сунуштады. Аталган чөптү өстүрүү ыкмасы, андан түшкөн киреше жана пайдасы тууралуу баяндаган видео министрликтин социалдык тармактагы баракчасына жарыяланган.
Билдирмеге караганда, бул өсүмдүк Кыргыз улуттук агрардык университетинин питомнигинде 2021-жылдан бери сынамык иретинде өстүрүлүп жатат. Учурда аны Кыргызстанда жайылтуу боюнча мамлекеттик программа даярдалууда. Ал кабыл алынса, шафранды туура өстүрүү боюнча дыйкандар атайын окуудан өтүшөт.
Айыл чарба илимдеринин доктору Абдыбек Асаналиевдин айтымында, шафрандын бир килограммы 2 миң евродон жогору турат, ал эми бир гектардан 10-15 килограмм алса болот.
Шафран — дүйнөдөгү эң кымбат өсүмдүктөрдүн бири. Анын курамында темир, калий, жез бар жана жалбырагы дарылык касиетке ээ. Шафран көбүнчө тамакка кошулат. Өсүмдүк жапайы жаратылышта сейрек кездешип, Иран, Испания жана Индияда көп өстүрүлөт.