БИШКЕК, 27-окт. — Sputnik. Кыргызстанда бир миллиондон ашык автоунаа бар. Бул тууралуу Улуттук статистика комитети жыл башындагы эсептөөлөргө таянуу менен билдирди.
Маалыматка ылайык, транспорттун саны 2021-жылга салыштырмалуу төрт пайызга көбөйгөн. Өлкө калкынын 1000ине алганда 158 жеңил автоунаа туура келген. Жеңил машиналардын эң чоң үлүшү Бишкек шаарына (калктын 1000ине 277 автоунаа), Чүй облусуна (238 автоунаа) жана Ош калаасына (207 автоунаа) туура келет.
2022-жылы облустук жана жергиликтүү маанидеги 23 чакырым жол, айыл чарбасындагы ички чарбалык 136 чакырым жол салынган.
Мындан сырткары, Түштүк транспорт жолу, Ош — Баткен — Исфана, Бишкек — Ош, Бишкек — Нарын — Торугарт, Ысык-Көл айланма жолу, Түндүк — Түштүк альтернативдик жолунун курулушу, "Борбор Азиядагы жол байланыштарын жакшыртуу" долбоору боюнча иштер, трассаларды оңдоо жана реконструкциялоо жүргүзүлгөн. Транспорт тармагына инвестициялардын 75 пайыздан ашыгы тышкы булактардын эсебинен каржыланган.