БИШКЕК, 27-окт. — Sputnik. Кыргызстанда алгачкы ирет Улуу Ата Мекендик согуштун эстеликтери менен мемориалдарынын санариптик картасы иштелип чыкты.
Бүгүн Бишкек финансы-экономикалык техникумунда картанын презентациясы өттү. Иш-чарага КРСУнун, Россиянын Бишкектеги илим жана маданият борборунун, РФ элчилиги менен Росструдничествонун өкүлдөрү катышты.
Бул долбоор Кыргызстандагы алгачкы жана жалгыз санарип карта болуп саналып, заманбап талаптарга жооп берет.
Эстеликтер менен мемориалдардан тышкары бул картада Улуу Ата Мекендик согуш жылдары Кыргыз ССРинде пайда болгон тарыхый жана маданий мурастар да көрсөтүлгөн. Алардын катарында эвакуацияланган заводдор, ишканалар, училищелер, медициналык мекемелер бар. Картада согуштун баатырлары жашаган жери, алар төрөлгөн калктуу конуш жана кайсы жерден фронтко кеткени да көрсөтүлөт.
Ленинград блокадачыларынын кыргыз коомунун башчысынын орун басары Марат Кутанов карта биринчи кезекте китепти аз окуган, бирок интернетте көп убактысын өткөргөн жаштар үчүн түзүлгөнүн белгиледи.
"Интерактивдүү картадан окуучулар, студенттер Улуу Ата Мекендик согуштун бардык мемориалдарын жана эстеликтерин көрүп, тарыхка сүңгүй алышат. Тарыхый мурастардын санарип реестрине кошумча опцияларды кошкондо өлкөдөгү бардык эстеликтердин абалына онлайн мониторинг жүргүзүүгө болот", — деди Кутанов.
Ал санарип картаны түзүүдө "Улуу Жеңиштин эстеликтери" электрондук китеби негиз болуп бергенин кошумчалады.
"Биз бул санарип картаны түзүү үчүн китептин электрондук вариантын колдондук. 2024-жылдын 9-майына чейин бул картага өлкөдөгү бардык эстеликтерди киргизүүнү пландап жатабыз. Учурда материалдар топтолуп башка иштер аткарылууда. Биз бул долбоорго Бишкек финансылык-экономикалык техникумунун жана Кыргыз-Россия Славян университетинин студенттерин тартууну көздөп жатабыз", — деди Кутанов.
Ал ошондой картаны кыргыз тилине которуу пландалып жатканын кошумчалады.