БИШКЕК, 26-окт. — Sputnik. Кызыл-Кыяда 32 жаштагы Л.Ш. аттуу кишини атып кетишти. Бул тууралуу Баткен ОИИБдин маалымат кызматы билдирди.
25-октябрь түнү саат 02.15тер чамасында шаардагы ичимдик саткан дүкөндөрдүн биринде белгисиз киши куралы менен башка кишини атып салганы тууралуу маалымат түшкөн. Жерине шаардык милициянын жетекчиси ыкчам тергөө тобу менен барган.
"Аталган жайда Кызыл-Кыя шаарынын 32 жаштагы Л.Ш. аттуу тургуну менен Караван айылынын 27 жаштагы И.У. аттуу жашоочусу уруша кеткен. Натыйжада И.У. жанындагы куралы менен жаңжалдашкан адамды ичке атып, изин жашырган. Жаракат алган 32 жаштагы киши Кызыл-Кыя шаарынын жалпы дарыгердик практикалык борборунун жандандыруу бөлүмүнө жеткирилген. Бирок алган жараатынан улам каза болуп калган", — деп айтылат маалыматта.
Окуя боюнча Кылмыш-жаза кодексинин 122-беренеси ("Адам өлтүрүү") менен кылмыш иши козголуп, 27 жаштагы шектүүнүн жүргөн жерин аныктоо боюнча ыкчам иликтөө иштери жүргүзүлүүдө.
Тергөө иштеринин маалыматына караганда, каза болгон киши жана издөөгө алынган жаран мурда бир нече жолу сот жообуна тартылган.