БИШКЕК, 26-окт. — Sputnik. "Күрмөнтү" цемент заводунун 93,17 пайыз акциясы мамлекеттин менчигине өткөрүлдү. Бул тууралуу УКМК билдирди.
Атайын кызматтын маалыматына караганда, кримтөбөл Камчыбек Асанбек (Камчы Көлбаев) жеке компаниялар жана бирөөгө каттатуу жолу аркылуу өндүрүш ишканасынын ишин көзөмөлдөп турган.
"Ишкананы төмөндөтүлгөн рыноктук баада жеке менчикке өткөрүү максатында Асанбектин адамдары өндүрүштүк ишкананы банкрот кылуу үчүн жасалма шарттарды түзүшкөн. Заводдун 93,17 пайыз акциясы Мамлекеттик мүлктү башкаруу боюнча мамлекеттик агенттикке өткөрүлдү. Калган 6,83 пайызы ишкананын жумушчуларына таандык", — деди УКМКдан.
"Күрмөнтү" цемент заводу Ысык-Көл облусундагы Ак-Булак айылында жайгашкан. Ишкана 1954-жылы курулуп, жогорку маркадагы цемент өндүрүүгө адистешкен.