БИШКЕК, 25-окт. — Sputnik. Бишкекте автобустун айдоочусу эки адамды сүзүп, 84 жаштагы карыя көз жумганын Милициянын кайгуул кызматынан кабарлашты.
Жол кырсыгы кечээ, 24-октябрда, катталган.
"№48 автобус Жибек Жолу проспектинен чыгышты көздөй баратып, Ала-Арча көчөсүнүн кесилишине жетпей жол чийинден өтүп бараткан эки адамды сүзүп алган. Натыйжада 84 жаштагы карыя окуя болгон жерден көз жумган. 48 жаштагы киши ооруканага жаткырылган", — деп жазылат маалыматта.
Андан сырткары, автобустун ичиндеги дагы бир жүргүнчү жаракат алганы айтылды. Автобус айып короого токтотулуп, тийиштүү экспертиза дайындалган.