БИШКЕК, 22-окт. — Sputnik. Израиль армиясы Сириянын Дамаск менен Алепподогу аэропортторуна сокку урганын Сириянын мамлекеттик телевидениесинин маалыматына таянуу менен РИА Новости жазды.
"Бүгүн таңкы саат 5:25те Израиль армиясы бир убакта эки жактан ракеталарын учуруп, Дамаск менен Алепподогу эл аралык аэропортторго сокку урду. Бир кызматкер көз жумуп, бирөө жаракат алды. Эки аэропорттун учуп-конуучу тилкеси талкаланып жарактан чыкты", — деп айтылат кабарда.
Израилдиктер менен палестиналыктардын ортосундагы жаңжал күчөгөндөн бери Израиль армиясы (ЦАХАЛ) Сириянын аэропортторуна байма-бай чабуул коюп келет. ЦАХАЛ буга чейин Сирия же Ливандан болчу кол салуудан кооптонуп жатканын айткан. Россиянын ТИМи Израилдин мындай аракетин Сириянын суверенитети жана эл аралык укук нормаларынын одоно бузулушу деп атады.
Израиль — Паленстина жаңжалы
7-октябрь күнү эртең менен Израиль ХАМАС аскердик канаты жарыялаган "Аль-Акса топон суусу" операциясынын алкагында Газа сектору тараптан болуп көрбөгөндөй чабуулга дуушар болгон. Ракеталык соккулардан кийин уюмдун жоокерлери еврей мамлекетинин түштүк чегине кирип барган.
Жооп иретинде ЦАХАЛ ХАМАСка каршы "Темир кылыч" операциясын баштаган. Израиль чабуул жасалгандан бир нече күн өткөн соң Газа менен чектешкен калктуу конуштарды кайра өз көзөмөлүнө алып, сектордун аймагындагы объектилерге сокку ура баштаган. Мындан тышкары, аймакты толугу менен блокадалап, суу, азык-түлүк, электр кубаты, дары-дармек, отун ташуу токтотулган.
Палестинанын Саламаттык сактоо министрлиги ишемби күнү Газа секторунда тирешүүдөн каза болгондордун саны 4 385 адамга жеткенин кабарлаган, 13 миңден ашуун тургун жарадар болгон. Ал эми Израилде, жергиликтүү бийликтин берген маалыматы боюнча, 1300дөн ашуун адам көз жумду.
Чырдын чоо-жайы
Тараптардын аймактык кызыкчылыгы менен байланышкан палестиндик-израилдик жаңжал ондогон жылдардан бери региондогу кагылышуунун себепкери болуп келет. СССРдин кийлигишүүсү менен 1947-жылы БУУ Израиль жана Палестина мамлекеттерин түзүү чечимин кабыл алган. Бирок натыйжада Израиль гана түзүлгөн. Тель-Авив эки өлкө принцибине макул болгону менен палестиналык аймактарды бошотпой келет.