БИШКЕК, 22-окт. — Sputnik. Грециянын Афина шаарында өтүп жаткан грек-рим күрөшү боюнча ардагерлер арасындагы дүйнөлүк чемпионатта депутат Тазабек Икрамов күмүш медаль жеңип алганын Жогорку Кеңештин Элдик тобу билдирди.
Маалыматта Икрамовдун Иран, Казакстан, Польшанын балбандары менен күч сынашып финалга чыкканы айтылат. Чечүүчү кармашта швециялык балбанга утулуп, күмүш медаль тагынган.
Депутат өзү да чемпионат тууралуу социалдык баракчасына жазып, биринчи орун албай калганына өкүнгөн. Ошентсе да күйөрмандык кылып, колдоо көрсөткөндөрдүн баарына ыраазылык билдирди.
Белгилей кетсек, Икрамов 2019-жылы аталган чемпионаттан коло алган. Эл өкүлү учурда 49 жашта.