Жер ресурстары кызматы санариптештирилип, калкка аралыктан кызмат көрсөтүлүүдө. Бул тууралуу Айыл чарба министрлигине караштуу Жер ресурстары кызматынын геомаалыматтык системалар жана маалыматтык технологиялар башкармалыгынын башчысы Жакшылык Токтосунов Sputnik Кыргызстан радиосунда маек куруп жатып билдирди.
Анын айтымында, Жер ресурстары кызматы кыймылсыз мүлктү каттоо, геодезия жана картография менен башка жерге байланышкан мамлекеттик саясатты ишке ашырат.
"Өкмөт тарабынан бекитилген бирдиктүү реестрге ылайык, Жер ресурстары кызматы калкка кыймылсыз мүлктү каттоо, кыймылсыз мүлктү ажыратуу келишимдерин каттоо, кыймылсыз мүлк бирдиктерин техникалык изилдөө, жерге жайгаштыруу иштерин жүргүзүү, жер участогуна укуктук күбөлөндүрүүчү документтерди (кызыл китеп) берүү, топографиялык, геодезиялык сүрөткө тартуу, картографиялык иштер боюнча маалыматтарды берүү жана эң көп талап кылынган кыймылсыз мүлк жөнүндө маалыматтарды берүү кызматтарын көрсөтөт. Мына ушул кызматтардын баары санариптештирилип, электрондук форматка өткөн. Ал кызматтар "Түндүк" электрондук порталы, "О деньги" жана "Мегапей" тиркемелери аркылуу көрсөтүлүүдө. Ошондой эле санарип кызмат көрсөтүү башка мекемелердин электрондук системалары менен интеграцияланууда. Башкача айтканда, мамлекеттик органдар атуулдардан маалым каттарды талап кылбастан, түз эле системадан алат. Өлкөдө 3 миллион 464 миң кыймылсыз мүлк бар. Анын 95 пайызы санариптештирилип, каттоого алынды. Мындан тышкары, кыймылсыз мүлк боюнча архивдин 90 пайызы электрондук порталга киргизилди", — деди Токтосунов.
Айыл чарба министрлигине караштуу Жер ресурстары кызматынын басма сөз катчысы Тилек Тургуналы уулу
© Фото / пресс-служба Министерства сельского хозяйства КР
Ал эми Айыл чарба министрлигине караштуу Жер ресурстары кызматынын басма сөз катчысы Тилек Тургуналы уулу "Пей 24" терминалдары аркылуу дагы тийиштүү маалыматтарды алууга мүмкүндүк түзүлгөнүн маалымдады.
"Электрондук порталды же мобилдик тиркемени колдоно албагандар бар. Алар үчүн бул кызматтар терминалдан тийиштүү маалыматтарды алса болот. Бул үчүн терминалдан Мамлекеттик кызматтарды, андан кийин Айыл чарба министрлигин тандайт. Ошол жерден идентификациялык кодун жазса электрондук документ даяр болот. Кагаз түрүндө чыкпагандыктан, WhatsApp номерине PDF форматында жөнөтүүгө мүмкүндүк түзүлгөн. Натыйжада терминал, тиркеме, порталдан быйылкы жылдын тогуз айында үч миллионго чукул маалымат алынган. Бул жарандардын жол киреге каражатын, убактысын жана башка чыгымдарын үнөмдөгөнүн билдирет", — деди Тургуналы уулу.
Ошондой эле бул кызматтарды "Түндүк" порталынын мобилдик тиркемеси аркылуу дагы колдонсо болору кошумчаланды.