БИШКЕК, 19-окт. — Sputnik. Кыргызстандын банктары акчаны технологияны өнүктүрүүгө салышы керек. Мындай пикири менен президенттик администрациянын санариптик өнүктүрүү бөлүмүнүн башчысы Азамат Буржуев FinConference 2023 иш-чарасында бөлүштү.
Ал банктан технологиялык компанияга транформацияланган "Сбер" (мурда "Сбербанк" деп аталчу ) банкын мисал келтирген. Эксперттин айтымында, учурда аталган компания акылдуу жабдууларды чыгарып, жасалма интеллектини өнүктүрүү үчүн өтө ири суммадагы акча салат.
"Мунун баарын биздин банктар да ушул жолго түшсө деген ниет менен айтып жатам. Биз акчаны технологияга салышыбыз керек. Былтыр, мурдагы жылдары геосаясий кырдаал, финансы агымдарынын өсүшүнө байланыштуу биздин банктар жакшы эле киреше тапты. Каражатты инновация, технологияга жумшоо убактысы келди", — деди Буржуев.
Буга чейин Кыргызстандын Банктар союзу былтыр рекорддук көлөмдө — 23,7 миллиард сомдук (2021-жылга салыштырмалуу беш эсе көп) киреше алынганын билдирген. Улуттук банктын маалыматтары мындан айырмаланат. Тагыраагы, алардын эсебинде пайда 23,1 миллиард сомдон жогорураак болгон. Бул, кыязы, ар кыл ыкмалар менен эсептелишине байланыштуу болсо керек. Улуттук банк кирешеден алынган салыктан, потенциалдуу чыгымдардан жана аларды жабуу үчүн коюлган резервдерден кийинки маалыматты берген.
Бул жылы банк секторунда киреше дагы өскөн. Сегиз ай ичинде банктар 16 миллиард 330,9 миллион сом акча тапкан. Бул былтыркы жылга салыштырмалуу 4 миллиард сомго көп.